14 fala smolsmol binis long Luganville I bin komplitim wan intensif 3 dei trening woksop long Bisnis Planning mo patisipet long wan monitaring mo ivaluesen tua blong asesem ol impak long ol bisnis tru long wan trening we VCCI I bin karemaot long las kwota blong 2018.
VCCI Bisnis Trena Irene Titek mo Yvonne Leo Taiki, Bisnis Link Pasifik Prokram Maneja ibin ko long Luganville long sekon wik blong Julae blong dilivarem woksop mo karemaot asesmen.
Irene, VCCI Bisnis Trening Ofisa mo woksop fasiliteta I talemaot se, ‘Tingting bihaen long woksop long Santo hemi blong provadem trening long wan eria we ol patisipen oli bin talemaot olsem wan nid long taem blong wan trening long bifo long Luganville’
‘Tingting bihaen long impak stadi I blong jekem prokres we ol bisnis olibin mekem olsem wan risal blong Prodaksen Inovesen mo Prodak Kwaliti trening we ol semak bisnis ia oli bin tekem pat long hem tru long VCCI long manis blong Oktoba mo Novemba 2018. Yumi bin lanem plante samting tru long ol saet visit mo lukim ol positif risal we ol bisnis ia I mekem we I kam antap gud aftalong trening ia. Yumi bin lanem tu long ol bisnis ia wanem nao ol samting we oli mekem implimentesen blong ol aedia blong olgeta I slo, mo ol samting ia I givhan long yumi blong hao nao yumi save jenisim aproj blong trening long fiuja.
Long en blong wik, ol patisipen we oli atendem woksop mo ol saet visit oli bin harem gud mo filim se oli kasem wan gud samting. Wan patisipen I serem se, ‘Mi wandem konkratuletem Vanuatu Jemba blong Komes blong provaedem tisfala trening long Bisnis Planning long mifala mo alaoem mifala blong lisen mo inspae long ol jalenses mo sakses blong ol kolik blong mifala. Bihaen long trening ia, mi bilif se mi save impruv long ol skil mo save blong mi blong mekem sua se igat imprumen long bisnis operesen blong mi’.
VCCI I wandem talem tankiu iko long Tred Divelopmen Divisen mo Enhans Intakreted Fremwok (EIF) Maneja Vanuatu Eliu Luen, mo Faenans Ofisa Rose Liu forom fanding sapot blong karemaot ol aktiviti we I stap antap mo trening wokshop. VCCI I stap luk fowod blong oli kontiniu blong provaedem sapot ia I kam blong I save provaedem ol sevis ia iko long ol bisnis we oli stap long ol Provins truaot long Vanuatu.
