Olgeta kwestin we oli askem plante

Sipos bilding blong mi hemi GRIN o WAET o hemi stap long Kategori 3 – bambae mi save go wok long hem naoia nomata we bilding i stap long red zon mo CBD hemi stil klos.

No, yu no save mekem hemia. Evri bilding insaed long CBD bambae oli nidim wan niufala pemit blong wok mo hemia bambae i save hapen nomo sipos we MIPU i kasem wan ditel enjiniaring ripot blong wanwan long olgeta bilding tru long wan enjinia i openem zon we bilding i stap long hem. Mekem sua se enjinia hemi stap regista lo Vanuatu, hemi gat setefekesen, mo insurens long liabiliti. Sipos yu nogat wan niufala 2025 pemit mo zon hemi open finis bambae yu no save wok long eni bilding insaed long red zon.

Mi no save gud sipos we bilding blong mi i stap insaed long red zon, hao nao bambae mi save jekem hemia?

Blong faenem stetas blong bilding blong yu, jekem stetas we i stap naoia. Tekem not se fes kwik asesmen hemi no wan faenol asesmen o hemi no givim raet long yu blong yusum bilding. Hemi mekem sua nomo se olgeta bilding oli kam olsem wan risk long sefti blong pablik.

Sipos bilding blong mi hemi stap long kategori 3 mo mi bin sabmitim finis enjiniaring asesmen blong mi i kam long MIPU, from wanem nao mi mas wetm blong oli openem zon? Hao nao bambae mi save zon we mi stap long hem?

Sipos we bilding blong yu i sef, maet i gat olgeta narafala bilding raon long yu we oli no sef. Olsem eksampol, olgeta bilding klosap long Lolam haus bambae oli save impak sipos we oli traem blong tekem aksen long bilding ia blong mekem se hemi sef. From hemia, bambae i nid blong tekem aksen long bilding ia mo mekem sua se hemi sef bifo yumi save yusum olgeta narafala bilding raon long hem. Yumi tekem not se bilding blong yu i sef be sefti i inkludum tu olgeta narafala bilding raon long yu. Bambae oli putumaot olgeta zon ia i no long taem mo letem yumi evriwan i save long hem (wok ia yumi no finisim yet.)

Mi gat bisnis insaed long wan bilding be mi no save sipos we ona blong bilding hemi finisim olgeta step we hemi nid blong tekem. Olsem wanem, i gat wan ples we mi save jekem hemia?

Stret rod blong hem i blong toktok stret wetem ona blong bilding o olgeta we yu gat lis wetem olgeta (rile stet ejen).

Hu nao bambae i pem enjiniaring ripot ia we MIPU i stap rikwaerem from olgeta ona blong bilding?

Ona blong bilding nao bambae i pem hemia. Sipos we yu gat insurens, yu save askem long insurens kampani sipos oli save kavremap kos ia. Blong karem konfemesen long kos, plis toktok long enjinia blong yu.

Wanem nao bambae mi mekem sipos we lis blong olgeta bilding kategori i soem rong kategori blong bilding blong mi?

Plis kontaktem Raviky Talae long ravikytalae@gmail.com o kolem 5456811 o Junior Shim George long gjunior@vanuatu.gov.vu o kolem 5300132 mo provaedem enjiniaring setifiket blong yu.

Wanem taem stret nao bambae CBD o zon blong mi bambae i open?

From we hemia bambae i rikwaerem evri bilding long kategori 1 &2 blong oli mas sef, yumi no save givim wan stret taemlaen. Gavman i stap folemap wetem olgeta insurens kampani mo olgeta bilding ona blong oli konfemem olgeta plan blong olgeta tugeta wetem taemlaen we bambae oli karemaot olgeta impoten aksen olsem demolisen mo olgeta narafala sefti mesa. Bambae hemi difren long wanwan zon hemia folem nomo hao kwik oli dil wetem olgeta mein problem long olgeta bilding. Taem VCCI i kasem moa infomesen bambae hemi letem yumi evriwan i save long hem.

From wanem nao yumi no save muvum taon i go long wan narafala ples?

Hemia bambae i nidim bigfala invesmen we yumi nogat naoia blong bildim olgeta niufala bilding mo bambae hemi tekem moa taem blong bildim wan niufala taon bitim we yumi lukluk long blong solvem olgleta bilding problem we yumi gat naoia mo lukluk blong openem Port Vila CBD bageken.

Olsem wanem nao bambae yumi save se hemi sef blong yumi save wok bageken long taon blong Port Vila?

Evri gavman otoriti oli stap wok naoia long sefti polisi, hemia wetem help blong olgeta spesolis we oli kam long olgeta dona kaontri. Naoia we i stap, oli stap wokhad blong mekem sua se evri infomesen we oli givimaot hemi mas stret mo hemi mas olgeta apdeit infomesen blong givhan long olgeta we oli stap mekem olgeta desisen.

Hao nao mi save manjem insurens klem blong mi?

Plis kontaktem insurens kampani blong yu mo folem olgeta proses blong olgeta. Bambae hemi gud blong yu stap gohed blong mekem regula foloap hemia sipos we bilding blong yu hemi stap long kategori 1.

Bambae Gavman i kompensetem olgeta bisnis long taem we oli no alaoem olgeta blong go insaed long bilding blong olgeta long taon nomata we hemi sef?

VCCI i stap wok long hemia naoia mo hemi stap askem faenans blong rere long olgeta stret bajet. Be hemia i had moa naoia we yumi jes go tru long wan eleksen mo wan gavman we bambae i fom bambae i mas holtaem olgeta bajet apruvol kasem Maj 2025.

Olsem wanem long Seafront, bambae hemi save open naoia o no?

Mifala i andastanem se zon ia we Seafront i stap long hem hemi ‘sef’ olsem we olgeta ovasi enjinia we oli stap wok wetem Gavman oli bin talem. Hemia i wan pat nomo blong zon, oli nid blong kliarem evri pat blong zon bifo hemi save open. Bambae mifala i gohed blong serem moa infomesen taem we mifala i kasem olgeta.